Stimadas conburgaisas e stimads conburgais, stimadas dunnas e stimads signurs

In cordial bainvegni tar il Departament federal per ambient, traffic, energia e communicaziun (DATEC).

Gugent As envid jau ad ina tura virtuala tras il departament che ha circa 1900 collavuraturas e collavuraturs.

Il DATEC ha l'incumbensa da garantir in svilup duraivel ed in bun provediment da basa cun servetschs publics - en l'interess da la societad, da l'ambient e da l'economia. La Svizra, ch'è situada en il center da l'Europa, è dependenta da vias da traffic modernas e da raits da communicaziun e d'electricitad effizientas.

Questas infrastructuras èn ina premissa impurtanta per la coesiun interna, per il barat cun l'exteriur e per in'economia prosperaivla.

Las basas per las decisiuns dal DATEC vegnan elavuradas en ils suandants uffizis:

• Uffizi federal d'energia (UFE)
• Uffizi federal da communicaziun (UFCOM)
• Uffizi federal da svilup dal territori (ARE)
• Uffizi federal da vias (UVIAS)
• Uffizi federal d'ambient (UFAM)
• Uffizi federal da traffic (UFT)
• Uffizi federal d'aviatica civila (UFAC)

Cun in clic sin il link correspundent vegnis Vus a savair dapli davart la rolla e davart las incumbensas dals singuls uffizis. Sin la pagina d'internet dal DATEC pudais Vus plinavant As infurmar davart mes pleds, davart mias intervistas e davart mia preschientscha ad occurrenzas publicas. Sche Vus giavischais dapli infurmaziuns davart il Cussegl federal svizzer, As recumond jau las suandantas paginas d'internet: www.admin.ch e www.cusseglfederal.ch

Jau m'allegrel da Voss interess e da Voss engaschi per la politica. Vus pudais er ma scriver Vossas ideas, Vossas propostas e Vossa critica. Jau sun cuntanschibla tar la suandant'adressa: doris.leuthard@gs-uvek.admin.ch.

Salids amicabels

Doris Leuthard, cussegliera federala

Scheffa dal Departament federal per ambient, traffic, energia e communicaziun