Princips da la politica dal svilup dal territori
Il terren svizzer vegn pli e pli stgars. La populaziun crescha cuntinuadamain e daventa adina pli mobila e l'economia ha adina pli grondas pretensiuns territorialas. La surfatscha d'abitar, da lavurar e la surfatscha per las infrastructuras da traffic daventan perquai pli e pli retschertgadas. Er la surfatscha da terren abità pro persuna augmenta anc adina. Mintga secunda va a perder in meter quadrat surfatscha dal terren agricul. Il svilup dal territori da la Svizra n'è pia betg uschè duraivel sco che la Constituziun federala pretenda.
Cun la revisiun da la Lescha federala davart la planisaziun dal territori vul la Confederaziun dar cuntrapaisa a quest fatg. La revisiun fraina il surdiever da terren, las zonas da construcziun memia grondas vegnan redimensiunadas e las reservas da terren da construcziun existentas vegnan utilisadas meglier. Quai garantescha in svilup pli cumpact dals abitadis, schanegia la cuntrada e mantegna l'attractivitad da la Svizra sco lieu d'abitar e da lavur.
La proposta dal Cussegl federal da far tschertas pitschnas novaziuns e precisaziuns en connex cun construir ordaifer las zonas da construcziun è vegnida acceptada dal parlament il settember 2023.
La separaziun tranter il territori da construcziun ed il territori betg surbajegiabel è in dals princips fundamentals da la planisaziun dal territori en Svizra. Tranter auter procura quai per pretschs bass per il terren d'agricultura e facilitescha uschia a l'agricultura da producir en ina moda che cuvra ils custs. Questa separaziun presta natiralmain er ina contribuziun considerabla per mantegnair ina cuntrada attractiva cun ina gronda valur da recreaziun.
A chaschun da sia sesida dals 8 da matg 2020 ha il Cussegl federal deliberà la Strategia dal terren Svizra sco er in pachet da mesiras per garantir en moda persistenta la resursa terren. Tar questa strategia tutgan il Plan sectorial Surfatschas cun culturas alternantas, il Center da cumpetenzas Terren ed in concept per ina registraziun da las infurmaziuns dal terren per l'entira Svizra.
Il rom d'orientaziun e d'acziun da la politica federala da svilup dal territori vegn furnì dal Concept dal territori Svizra che la Confederaziun, ils chantuns, las citads e las vischnancas han elavurà.
