En il decurs da ses onn presidial ha la presidenta da la Confederaziun Simonetta Sommaruga scuntrà bleras persunas interessantas. Persunas cun ils giavischs ed ils basegns ils pli variads. Persunas da provegnientscha differenta e cun perspectivas diversas per l’avegnir. Persunas che na stattan normalmain betg en la publicitad. Qua èn ellas però en il center da l’attenziun: «Mintga emna dun jau a talas persunas la pussaivladad d’exprimer qua in desideri, ina speranza, lur punct da vista.»
Video
Ina survista da tut ils inscunters
Gallaria da fotografias
«Jau giavisch che nus emprendian en questa crisa insatge or da l'atgna vulnerabilitad, che nus hajan dapli empatia per las persunas las pli vulnerablas da la societad e che nus ans engaschian sco pajais oravant tut per quellas persunas, per las qualas situaziuns da crisa n'èn betg situaziuns excepziunalas temporaras, mabain la vita da mintgadi; sco per exempel per las fugitivas ed ils fugitivs en ils camps da Moria. Perquai che sche quella crisa ans ha mussà insatge, lura è quai il fatg che nus essan colliads cun il rest dal mund.»
Simone Lappert, autura
«La Terra è malnetta, ma mo paucas persunas s'occupan da quai. Jau vuless avair quità da la natira e da noss planet. Jau giavisch in curtin, nua che jau poss cultivar e tgirar mias atgnas plantinas. E jau vom a prender si tut il palpiri che vegn bittà davent e che jau chat en la natira. I ma fa mal, sche jau ves quant rument che arriva giu per terra.»
Isalis Addor, 8 onns, co-concepidra da la carta per la fin da l'onn da la presidenta da la Confederaziun
«Quest onn 2020 – speranza in onn excepziunal – ans lascha ballantschar tranter tema e speranza. La tecnologia ans ha permess d’ans avischinar in l’auter en muments, nua ch’ils contacts n’eran betg pli pussaivels u betg pli prudents. Per la presidenta da la Confederaziun Simonetta Sommaruga avain nus stabilì bleras connexiuns virtualas cun sias e ses collegas en tut il mund, ina vaira midada da la moda e maniera da s’inscuntrar e da lavurar…»
Maurizio Aprile, supporter ICT da l’Uffizi federal d’informatica e da telecommunicaziun
«Jau sper ch’il temp actual fitg turbulent en connex cun la pandemia ans rendia puspè raschunaivels e che nus renconuschian meglier tge che vala propi en la vita e che nus vivian pli savens tenor questas valurs. Mes giavisch: dapli modestadad, dapli spiert da cuminanza ed oravant tut dapli respect da la natira.»
Sibylle Riesen, collavuratura da la sminca en il studio da la Chasa federala
«Jau sun superbia che nus dastgain purtar cun nossa lavur mintgatant in pau colur e plaschair en las stanzas, nua che nossa regenza prenda decisiuns impurtantas per nus tuts en quests temps difficils. Jau giavisch che questa situaziun speziala ans laschia puspè chapir meglier, tge regal che la vita è e quant impurtant ch'igl è d'avair respect per noss conumans, per ils animals e per las plantas.»
Silvia Seiler, collavuratura da l'Orticultura federala
«Mes giavisch è quel ch'i vegnia demussà dapli respect envers noss conumans en il mintgadi, en la politica ed en las medias. Respect ed empatia èn il fundament da l'umanitad, mancanza da respect percunter dat perditga d'arroganza e d'ignoranza. Noss mund dovra main pregiudizis e dapli chapientscha e resguard vicendaivel.»
Ambassadura Beatrice Schaer, scheffa da protocol dal DFAE
«Avant 7 onns è vegnida fundada cun grond entusiassem nossa retscha da concerts «Forum Musica da chombra», e dapi lura ha ella pudì s'etablir a Berna sco retscha speziala da musica da chombra. Ultra da musica porschan noss concerts er in lieu d'inscunter ed envidan ad in barat tranter public ed artist*as. Nus ans legrain fitg da dastgar beneventar regularmain dunna presidenta da la Confederaziun Simonetta Sommaruga en noss public.»
Hiroko Sakagami, pianista
«L'accident d'explosiun en il militar m'ha bittà or da la vita e m'ha sfurzà da chattar in'autra vita. Uschia hai jau chattà la musica en mai, ed jau sun daventà magister. Jau as giavisch che vus stoppias as decider e che vus scuntrias là vus sezs.»
Alexander Wyssmann, pianist da jazz e pedagog curativ tschorv, Scola per persunas tschorvas Zollikofen
«Il Bernerhof è in lieu en il center da Berna, nua che persunas sa scuntran. Persunas da tut il mund, da la politica, da l’economia, da la cultura, da las medias, dal sport. Jau vi ch’ellas sa sentian bain tar nus e sun gugent la persuna discreta che presta servetschs davosvart. Sche l’ambient constat, èsi simpel per ils giasts da sa barattar.»
Michela Lucchini Zobrist, manadra dal team «Occurrenzas» dal Bernerhof
«La renconuschientscha da la gronda impurtanza da la tgira per la societad sto sa reflectar en bunas cundiziuns da basa structuralas. Jau giavisch urgentamain ch’i vegnia tegnì quint tant pli svelt dals interess da la tgira sin plaun politic.»
Sonja Forster, direcziun dals servetschs da la Spitex Kriens
«S’engaschar en la politica è la meglra chaussa che ma è capitada. Per quest motiv è encuraschar e sustegnair ils giuvenils da sa participar ina da mias prioritads absolutas. La sanadad da nossa democrazia dependa da quai!»
Fabien Robyr, 22 onns, co-president dal comité d’organisaziun da la Sessiun dals giuvenils
«A l’Universitad da Basilea n'hai dà fin qua strusch cas da corona – per quai sun jau engraziaivla. Jau giavisch che quai restia uschia. Lain observar las reglas da distanza e d’igiena e proteger uschia nossa universitad!»
Andrea Schenker-Wicki, rectura da l’Universitad da Basilea
«Jau chat ch'ils giuvenils stuessan er vegnir tadlads pli savens. Blers giuvenils na gughegian betg da sa participar activamain e da communitgar l'atgna opiniun. Pervia da quai stuess la politica vegnir rendida meglier accessibla ed er integrar las vuschs dals giuvenils e sa sfadiar activamain per talas.»
Salvina Knobel, scolara da 14 onns da Lucerna
«Jau ma giavisch che tut las burgaisas e tut ils burgais hajan ina vusch. Pia tant umans pli vegls sco er persunas che n'èn anc betg maiorennas ed er persunas che n'han betg la naziunalitad svizra. Perquai ch'i fiss bun per la Svizra, sche uschè bleras persunas sco pussaivel han ina vusch e pon gidar a furmar la Svizra. – Quai vul numnadamain dir democrazia directa per mai!»
Konstantina Dologlou, scolara da 17 onns da Zug
«En il temp inquietant dal lockdown durant la crisa da corona essan nus stads confruntads er en l’Italia ed en Svizra cun grondas sfidas e temas persunalas, socialas ed economicas. Quest temp ha però er creà u rinforzà la confidenza vicendaivla, l’amicizia e la solidaritad. Jau giavisch che questas valurs sa fetschian valair en moda persistenta en nossa convivenza ed en nossa conscienza.»
Ruth Theus Baldassarre, ambassada svizra en l’Italia
«Igl è ina bella incumbensa da cumbatter – ensemen cun in team simpatic e dinamic – cunter il dumber creschent d’infecziuns cun il coronavirus. Cun nossa lavur pudain nus franar ed interrumper la chadaina d’infecziuns ed uschia salvar vitas!»
Simon Schulthess, contact tracer, Direcziun da la sanadad, dals fatgs socials, e da l’integraziun dal chantun Berna
«La tiba è in simbol per ils stgazis ils pli gronds da noss pajais: muntognas, flums, lais, prada, guauds ed animals, la naiv perpetna ed ils glatschers restants. Ils tuns da la tiba expriman l'engraziaivladad per la bellezza da la natira – ed expriman la speranza che l'indifferenza dals umans giaja a fin in bel di. Tgi ch'emprenda d'appreziar la simpladad da la natira, sa tge che signifitga ventira.»
Claudia Mazzucchelli, sunatiba
«Sche jau sun la tiba, ma sent jau colliada pli ferm cun la cultura svizra. Per mai èsi stà in'onur da sunar durant la crisa da corona davant chasas da persunas attempadas e da purtar uschia in zic variaziun en il mintgadi difficil da las persunas pli veglias pertutgadas spezialmain durant il lockdown.»
Catia Conti, sunatiba
«Il nov tunnel da basa dal Ceneri pussibilitescha temps da viadi pli curts e meglras colliaziuns tranter las differentas regiuns da la Svizra e dal Tessin sco er dals pajais vischins. Uschia reducescha el la distanza tranter culturas, umans e linguas.»
Gianna Sitta, assistenta commerziala AlpTransit
«Sco guid da plazzal en il rom dal project AlpTransit hai jau dastgà scuntrar millis d'umans dad tut il mund. Pervia da la crisa da corona n'è quai actualmain betg pli pussaivel. Jau giavisch che nus possian puspè ir en viadi senza tema e scuntrar auters umans e che noss uffants hajan in avegnir mobil e senza quitads.»
Davor Turkovic, guid da plazzal AlpTransit
«Jau hai fatg tras e vesì il svilup enorm dal traffic public en Svizra dals ultims 30 onns. Cun avrir il tunnel da basa dal Gottard e dal Ceneri ha nossa rait da viafier survegnì dus novs trajects da colliaziun fitg impurtants. Jau sper che la lavur e l'engaschament da tut quels umans che han pussibilità questas ovras da construcziun sajan stads a favur da noss uffants e da noss ambient.»
Arcangelo Ruperto, locomotivist, Bellinzona
«La fadia, la dolur e la suffrientscha sveglian numerusas dumondas: il giavisch ch’è naschì durant ils ultims mais è che la speranza na saja betg simplamain in «tut vegn bun» general, mabain ch’ella naschia da quai che dat senn e cuntinuitad a la vita, er en las situaziuns las pli difficilas e che l’engraziaivladad saja la moda usitada da vesair ils auters e la realitad.»
Rita Monotti, media, ospital La Carità, Locarno
«Concepir l’avegnir na vul en emprima lingia betg dir da s’imaginar tge che pudess capitar, mabain cunzunt da ponderar tge ch’ins vegn a FAR!»
Olivier Schaffter, pizzaria La Croix Blanche, Delémont
«Il davos temps ei staus accumpignaus ton da temas sco era da plaschers, dallas temas e dubis da buca reussir allas pretensiuns, denton era dils plaschers che la lavur gartegiada ha purtau. Savens ein las fatschas cuntentas d’engrazieivels clients stadas sco in sulegl che ha fatg bein ella truscha e lavur dil mintgadi. Persunalmein sun jeu denton dil meini ch’ins sto restar vinavon precauts!»
Judith Schnider, manadra dal Volg a Laax
«Nus ans giavischain ina scola statala bain francada en la populaziun che procura per l'egualitad da las schanzas tar la tscherna da professiun per che la derivanza na decidia betg davart la schanza da survegnir ina plazza d'emprendissadi.»
Tara, scolara e Christian Stähli, magister (scola Mösli, Ostermundigen)
«La Revoluziun da la dignitad da l’onn 2014 ha effectuà ina dinamica enorma. Decentralisaziun, e-democrazia e digitalisaziun han contribuì considerablamain ad ina Ucraina pli transparenta, pli gista, pli duraivla e pli innovativa. Jau giavisch che questas midadas subsistian – malgrà las sfidas actualas – e transfurmian mes pajais en in vair laboratori d’innovaziuns!»
Ilona Postemska, national programme officer, ambassada svizra en Ucraina
«La crisa en connex cun il coronavirus ha activà forzas remartgablas e manà a l’installaziun d’ina taskforce scientifica. Jau sper ch’il dialog intensivà tranter la scienza e la politica cuntinueschia – en vista a la midada dal clima ed ad autras sfidas.»
Joël Mesot, president da la SPF Turitg
«La dimensiun da la crisa da corona è stada nunimaginabla. L'economia è vegnida indeblida fermamain. La populaziun è daventada malsegira. Jau giavisch che nus tirian conclusiuns or da las enconuschientschas da questa crisa e barattian quellas cun l'economia e cun la societad, per bainbaud puspè survegnir confidenza en noss sistem – che s'extenda dal simpel decurs dal di fin a la lantschada da projects gronds e cumplexs.»
Nicole Loeb, delegada dal cussegl d'administraziun da la Loeb Holding SA
«Per las dunnas e per l'agricultura giavisch jau che nus emprendian insatge or da quest temp da crisa, che nus possian salvar ils aspects positivs e las experientschas per la societad e per il singul e che nus possian emplenir las largias e curreger las inegualitads e las cuntradicziuns ch'èn sa mussadas u vegnidas rinforzadas.»
Anne Challandes, presidenta da l'Uniun da las puras svizras
«Nus giavischain ch'i dettia er en l'avegnir uniuns uschè grondiusas sco il Club da ballape Sternenberg che sustegnan e promovan la persunalitad e la cumpetenza sociala da la giuventetgna tras ballape.»
Maria Guggisberg e Carmen Schlatter, trenadras dal Club da ballape Sternenberg
«Suenter la chauma da las dunnas è deplorablamain er avant la chauma da las dunnas! Mes giavisch è quel, che las numerusas pretensiuns da la chauma da las dunnas vegnian realisadas. Respect, toleranza e solidaritad tranter tut ils umans, tuttina da tge schlattaina, da tge orientaziun sexuala e da tge colur da la pel!»
Yoshiko Kusano, fotografa
«Jau giavisch dapli chapientscha per la cumbinaziun da producziun agricula e biodiversitad. In terren saun sco er ina flora ed ina fauna multifara muntan victualias sanadaivlas.»
Peter Schweizer, pur biologic
«La branscha da vin è fitg sut squitsch. Il giavisch da pudair interagir en moda normala cun nossa clientella ed il giavisch d'obtegnair ina segirezza economica per mias collegas e mes collegas da la branscha èn damai evidents. Jau giavisch però er che nus dumognian bain noss emprim onn sco manaschi da conversiun e che nus na percepeschian er en l’avegnir betg sco opposts ils aspects economics ed ecologics da la producziun da vin.»
Peter Mössner, maister viticultur e maister tschalerer, Arenenberg
«En questa perioda da crisa stuain nus esser attentas ed attents da tut temp, per ch’il virus na sa derasia betg. Las abitantas ed ils abitants pateschan, perquai ch’ellas ed els na pon betg pli vesair lur confamigliars. Ina tgira socioculturala è damai fitg impurtanta. Il persunal en las chasas d’attempads e da tgira è en privel da spussada e da stancladad. Jau giavisch che nossa lavur en il servetsch dals umans vegnia appreziada e renconuschida sco indispensabla en nossa societad.»
Brigitte Fontannaz, tgirunza da geriatria e psicogeriatria
«Jau hai 99 onns ed abit dapi bainbaud sis onns qua en la chasa d’attempads «Les Charmettes». Igl è stà per mai in’onur ed in grond plaschair da dastgar sunar clavazin a chaschun da la visita da la presidenta da la Confederaziun. Jau hai gì grond plaschair ch’ella è vegnida a visitar nossa instituziun il 1. da matg. Ses pleds d’engraziament persunals m’han commuventà e confortà. Jau giavisch che concerts sajan gratuits per persunas en las chasas d’attempads.»
Denise Evard, abitanta en la chasa d’attempads «Les Charmettes», pianista
«Jau giavisch che la professiun da cuschiniera e cuschinier saja valurisada meglier. Questa professiun è savens ina vocaziun, ils salaris bass pon però destruir il siemi. Jau vuless che la paja da basa da las cuschinieras e dals cuschiniers correspundia a la paja media svizra.»
Anne-Laure Liechti, cuschiniera en la chasa d’attempads «Les Charmettes» a Neuchâtel
«A chaschun da sia visita a Neuchâtel avain nus engrazià la presidenta da la Confederaziun per ses sustegn a favur da meglras cundiziuns da paja, particularmain en ils fatgs da sanadad ed en il commerzi. Er sche questas cundiziuns ston vegnir negoziadas tranter ils partenaris socials, èsi tuttina impurtant e normal ch'il Cussegl federal sustegnia quest pass, uschia sco ch'el sustegna er auters.»
David Taillard, secretari sindical e president da l'Union Syndicale Cantonale Neuchâteloise
«Il laud da la presidenta da la Confederaziun Simonetta Sommaruga a chaschun da sia visita en il center da pacs a Cadenazzo ha commovì vesaivlamain tut ils collavuraturs da la Posta. Noss chantun ha sentì cleramain la proximitad da las autoritads federalas. Per mai è quai stà in dals muments ils pli impurtants da mia carriera da 46 onns tar la Posta. Nus essan superbis da quai che nus avain fatg e da quai che nus vegnin anc a far per noss pajais. Jau giavisch da pudair quintar vinavant cun il sustegn che nus avain survegnì da nossa clientella durant quests mais difficils.»
Silvio Bianchi, manader dal center da logistica da la Posta a Cadenazzo (TI)
«Jau giavisch che mintga singula e mintga singul da nus haja emprendì d’appreziar tras la crisa pervia dal coronavirus la buna vita en Svizra – e che tut las clientas e tut ils clients sco er tut mias emploiadas e tut mes emploiads restian saunas e sauns.»
Christian Moser, CM-Hairstylist, Berna
«Durant la crisa pervia dal coronavirus èsi sa mussà quant impurtant ch’il manaschi da scola è e tge lavur preziusa che tut las persunas involvidas prestan. Jau giavisch perquai ina revalitaziun durabla da la professiun da magistra e da magister. Questa revalitaziun duai effectuar che surtut puspè dapli umens giuvens sajan loschs da tscherner questa professiun.»
Peter Kämpfen, manader da scola dal Grosses Länggassschulhaus a Berna
«Mes giavisch è ch'ils umans emprendian finalmain da respectar tut ils umans – ch'i sajan sauns u malsauns, ritgs u povers, um u dunna ed independentamain da lur colur da la pel – sco eguals.»
Anna Wüstefeld, scolara a la scola media spezialisada, domiciliada sin il bain puril biologic Liebistorf
«La situaziun da crisa actuala en connex cun il coronavirus è nova. Per dumagnar ella stuain nus chattar soluziuns dal tuttafatg novas. Jau giavisch che l’engaschi extraordinari da las persunas da tgira dal CHUV ed en general da las persunas spezialisadas da l’ospital permettia da porscher a la populaziun servetschs da tgira d’auta qualitad durant l’entira pandemia.»
Thierry Szostek, manader dal servetsch da tgira, medischina intensiva da creschids, CHUV (Centre hospitalier universitaire vaudois)
«Per l’avegnir ans giavisch jau che la protecziun ed il provediment da la sanadad publica hajan vinavant la prioritad envers ils interess economics.»
Ursi Barandun Schäfer, experta da tgira da l’Ospital universitar da Basilea
«Jau giavisch che las burgaisas ed ils burgais svizzers hajan suenter questa crisa en connex cun il coronavirus il curaschi dad ir novas vias, ch’els hajan la perseveranza da realisar lur projects e ch’els mussian solidaritad envers auters.»
Serge Zwahlen, manader da fatschenta, Zwahlen SA a Court (BE)
La presidenta da la Confederaziun Simonetta Sommaruga: «Grazia a Nora ed a tuttas e tuts che lantschan acziuns sumegliantas. Quai è grondius! Cun voss flyer faschais vus quai che nus tuts duvrain ussa: er sche nus tegnain fisicamain distanza, essan nus qua in per l’auter.»
«Mes giavisch èsi, che nus umans chattian il curaschi d’ans avrir envers chaussas nunenconuschentas, e quai malgrà las bleras temas ch’ans circumdeschan di per di. Saja quai en furma d’inscunters cun umans, cun l’art ubain er cun patratgs. Mo sche nus ristgain da sortir da nossa zona da confort, pudain nus far l’experientscha ch’i na capita nagut nausch, mabain che nus vegnin remunerads per l’avertadad. Quai è quai che l’art ans mussa adina puspè.»
Kathleen Bühler, curatura dal Museum d’art da Berna
«Grazia ad ina politica agrara ch’è orientada anc pli fitg vers intents ecologics, po l’agricultura giugar ina rolla decisiva en il cumbat cunter la midada dal clima.»
Valérie Piccand, pura
«Per l’onn 2020 giavisch jau che mes geniturs, che vivan en il Giura e ch’han omadus sur 55 onns, chattian puspè ina lavur.»
Mélanie, schurnalista per l’emissiun da televisiun da la Svizra franzosa «Infrarouge»
«Jau giavisch a mai, a mias cunviagiaturas ed a mes cunviagiaturs da tut temp in segir e bun viadi.»
Josef, conductur tar las Viafiers federalas austriacas
«Jau giavisch in mund senza guerra, senza exclusiun, senza fom e che tut ils umans hajan ils medems dretgs.»
Gabor Hirsch, survivent dal holocaust
«Jau giavisch ch’i haja naiv durant l’enviern.»
Robin, participant als gieus olimpics d’enviern da la giuventetgna
«Noss products na derivan betg da la binda. Nus faschain tut a maun e cun blera amur!»
Cornelia, mainafatschenta vendita e Matthias, pasterner-pastizier diplomà
