Strategia dal DATEC

Grazia ad infrastructuras effizientas duai la Svizra esser er l'onn 2030 pronta per las sfidas dal futur ed avair ina ferma plazza economica sco er in'auta qualitad da viver. Sin tge sfidas vegn mess il focus e tge finamiras e mesiras resultan qua tras per il DATEC? Las respostas respectivas resultan da la strategia dal departament. 

Sfidas centralas

La definiziun da las sfidas centralas resulta d'ina retscha da svilups che determineschan la situaziun da partenza en ils champs d'incumbensa dal DATEC. Quai èn tranter auter:

  • creschientscha cuntinuanta da la populaziun
  • augment dal traffic da viafier, stradal ed aviatic
  • spustament da la dumonda d'energia davent dals purtaders d'energia fossils vi a l'electricitad
  • augment da las surfatschas d'abitadi
  • stabilisaziun da las emissiuns da gas cun effect da serra
  • grond consum da resursas
  • perdita cuntinuanta da biodiversitad e da sias prestaziuns a favur dal sistem ecologic
  • digitalisaziun cuntinuanta
  • augment da la communicaziun tranter maschinas («internet of things»)
  • svelta creschientscha da la quantitad da datas

Da questas tendenzas resultan per il DATEC trais grondas sfidas interdisciplinaras che vegnan ad influenzar decisivamain l'adempliment da las incumbensas da l'entir departament:

Questas sfidas n'èn betg separadas cleramain ina da l'autra, mabain stattan en interacziun intensiva ina cun l'autra. Uschia influenzescha per exempel la politica d'energia er la politica da traffic e la planisaziun dal territori e viceversa.
En connex cun questas sfidas èsi ultra da quai necessari da sa dumandar, quant bain ch'il departament è preparà per ademplir las incumbensas politicas en moda effizienta ed efficazia. (Vesair latiers la strategia, chapitel 3.4)

Finamiras e mesiras

Sa basond sin las tendenzas da svilup e sin las sfidas definescha la strategia dal DATEC finamiras d'effects a lunga vista. Ellas èn orientadas a l'orizont da temp 2030 e cuvran las sfidas uschè bain sco pussaivel. Las mesiras èn percunter orientadas a l'orizont da temp pli curt 2019. Ellas signaliseschan il basegn d'agir direct e na cuvran betg l'entir spectrum da sfidas. Cunzunt las mesiras vegnan controlladas e cumplettadas regularmain.

Tut las finamiras e mesiras: Strategia dal DATEC 2016 (chapitel 4)

Intent da la strategia

La strategia dal DATEC formulescha las sfidas e finamiras centralas per il DATEC cun in orizont da temp fin 2030 e descriva mesiras fin 2019. Uschia furma ella in rom d'orientaziun ed ina basa da chapientscha per tut ils secturs dal DATEC. La strategia sa drizza vers anora e vers anen: Ella duai mussar a tut las unitads d'organisaziun dal DATEC e la finala a tut las collavuraturas ed a tut ils collavuraturs, en tge senn che la direcziun dal departament vul sviluppar ils secturs attribuids al DATEC. Ultra da quai ha la strategia l'intent da render pli transparenta la politica dal DATEC envers ils auters departaments, il parlament u ils acturs ordaifer l'administraziun federala (chantuns, economia, federaziuns, populaziun e.u.v.).

Cun las soluziuns ch'el propona, tegna il DATEC quint en moda equilibrada da dimensiuns ecologicas, economicas e socialas, ed el s'orientescha al princip da la lunga durada sco er ad interacziuns cun il mund globalisà.

La strategia vegn controllada mintga 4 onns e sche necessari revedida. Per l'onn 2016 è vegnida fatga in'actualisaziun: Cuntrari a la strategia 2012 na sa restrenscha en spezial la terza sfida tematica betg pli a la participaziun al svilup da la societad d'infurmaziun, mabain cuntegna il svilup digital da la Svizra.

Ulteriuras strategias e planisaziuns

La strategia dal DATEC è ina cumplettaziun da differentas autras strategias e planisaziuns dal Cussegl federal e dal parlament, p.ex.:

Contact

Secretariat general
Departament federal per ambient, traffic, energia e communicaziun (DATEC)

Chasa federala nord
CH-3003 Bern

Tel.
+41 58 462 55 11

Ulteriurs contacts

Stampar il contact

https://www.uvek.admin.ch/content/uvek/rm/home/datec/strategia.html