La Lescha d'energia, la Lescha davart il CO2, la Lescha davart il clima e l'innovaziun e la Lescha davart il provediment d'electricitad furman cuminaivlamain l'instrumentari per ina politica d'energia persistenta e moderna en Svizra.

Infrastructuras da traffic modernas ed effizientas èn ina premissa elementara per in'auta qualitad da viver e per la prosperitad da la Svizra sco plazza economica.

La politica d'ambient dal Cussegl federal fa effect. La qualitad da l'aua dals flums e dals lais è auta. En il cumbat cunter l'impestaziun da l'aria han ins fatg progress considerabels. Il guaud è intact. Grazia al recicladi vegnan reutilisadas bleras materias custaivlas. La protecziun dal terren e l'impurtanza da la diversitad da las spezias biologicas èn francadas en la conscienza dals umans.

Il terren svizzer vegn pli e pli stgars. La populaziun crescha cuntinuadamain e daventa adina pli mobila e l'economia ha adina pli grondas pretensiuns territorialas. La surfatscha d'abitar, da lavurar e la surfatscha per las infrastructuras da traffic daventan perquai pli e pli retschertgadas. Er la surfatscha da terren abità pro persuna augmenta anc adina. Mintga secunda va a perder in meter quadrat surfatscha dal terren agricul. Il svilup dal territori da la Svizra n'è pia betg uschè duraivel sco che la Constituziun federala pretenda.

In’infrastructura da communicaziun stabila e progressiva è indispensabla en temps da digitalisaziun. Medemamain è la Svizra cun sia democrazia directa dependenta d’ina plazza da medias ferma e multifara. La politica da communicaziun da la Confederaziun s’orientescha a quests basegns.

Cusseglier federal Albert Rösti maina dapi il 2023 il Departament federal per ambient, traffic, economia e communicaziun DATEC. Passa 2500 collavuraturas e collavuraturs dals set uffizis federals, dal Secretariat general, da las autoritads reglamentaras e dals posts spezialisads dal DATEC s'engaschan per in svilup duraivel.