Princips da la politica da communicaziun
In’infrastructura da communicaziun stabila e progressiva è indispensabla en temps da digitalisaziun. Medemamain è la Svizra cun sia democrazia directa dependenta d’ina plazza da medias ferma e multifara. La politica da communicaziun da la Confederaziun s’orientescha a quests basegns.
La politica da communicaziun e da las medias da la Confederaziun è francada en la constituziun. Tar l’applicaziun ha l’Uffizi federal da communicaziun (UFCOM) ina funcziun centrala e da coordinaziun.
Medias
La digitalisaziun ha chaschunà ina midada fundamentala en il mund da las medias. Medias stampadas e radio concurrenzeschan cun portals online e medias socialas per l’attenziun dal public. Entradas da reclama regressivas mettan sut squitsch ils models da fatschenta cumprovads.
A medem temp dependa la democrazia svizra d’ina populaziun infurmada e d’ina viva cultura da discussiun. Las medias prestan en quest connex ina contribuziun essenziala. Ellas provedan la populaziun cun infurmaziuns, contribueschan a la furmaziun da l’opiniun ed han ina funcziun da controlla.
L’UFCOM procura per las premissas d’in service public che dat identitad en il sectur da las medias electronicas e per las basas da promover las medias confurm al temp.
Telecommunicaziun e posta
La populaziun e l’economia ston disponer d’ina infrastructura segira e moderna. Plinavant ston ellas avair a disposiziun servetschs da telecommunicaziun e da posta multifars, favuraivels e cumpetitivs. Per quai dovri cundiziuns da basa adattadas. L’UFCOM procura per las premissas per ina concurrenza efficazia tranter ils purschiders e definescha las purschidas dals servetschs da basa, uschia che tut la populaziun ha access ad internet svelt, a cloms d’urgenza ed a servetschs da posta.
Frequenzas èn in bain stgars. Perquai sto l’UFCOM coordinar lur utilisaziun. Plinavant administrescha e distribuescha el ils elements d’adressaziun sco p. ex. numers da telefon e numers curts. El s’engascha, per ch’indrizs da telecommunicaziun ed apparats electronics adempleschian las pretensiuns legalas e na chaschunian nagins disturbis. Sch’i dat tuttina in disturbi da la telecommunicaziun, eruescha l’UFCOM la causa dal problem.
Ulteriuras infurmaziuns
Contact
Chasa federala nord
3003 Bern