Publitgà sin il 21 schaner 2026

«200 francs bastan! (Iniziativa SSR)»

Ils 8 da mars 2026 decidan las votantas ed ils votants davart l'iniziativa dal pievel «200 francs bastan! (Iniziativa SSR)». L'iniziativa pretenda da limitar la taxa per chasadas privatas a 200 francs per onn, da liberar tut las interpresas da l'obligaziun da pajar la taxa e da restrenscher la SSR ad in «servetsch indispensabel per la generalitad». Il Cussegl federal ed il parlament refusan l'iniziativa. Tenor lur avis va ella memia lunsch. Il Cussegl federal ha concludì in cuntraproject che distgargia medemamain las chasadas e las interpresas. Cuntrari a l'iniziativa saja il cuntraproject commensurà, uschia che la SSR possia garantir er vinavant il service public en tut las regiuns linguisticas.

Chasadas privatas pajan oz ina taxa da radio e televisiun da 335 francs per onn. Er interpresas ch'èn suttamessas a la taglia sin la plivalur e che fan ina svieuta da 500 000 francs u dapli, pajan ina taxa; l'autezza da la taxa sa drizza tenor la svieuta. Cun la taxa vegn finanziada en emprima lingia l'incumbensa da service public da la Societad svizra da radio e televisiun (SSR).

Taxa da radio e televisiun (pagina d'internet da l'Uffizi federal da communicaziun UFCOM)

Cuntraproject dal Cussegl federal: reducziun a 300 francs

Er il Cussegl federal ha constatà in basegn d'agir tar la SSR ed ha elavurà in cuntraproject moderà. El ha concludì da sbassar fin l'onn 2029 la taxa per chasadas privatas pass per pass sin 300 francs.

Dapi l’introducziun dal sistem da taxas actual l’onn 2019 ha il Cussegl federal sbassà ina giada la taxa per las chasadas e gia decidì duas ulteriuras reducziuns. — Taxa da radio e televisiun per chasada ed onn

Er las interpresas vegnan distgargiadas: A partir dal 2027 ston mo pli var 20 pertschient da las interpresas ch'èn suttamessas a la taglia sin la plivalur, pajar ina taxa. Uschia sto la SSR spargnar e porscher in program reducì, ma tuttina da buna qualitad. Quai duai dar dapli spazi d'agir a las medias privatas.

Cuntegn da l'iniziativa

L'iniziativa vul reducir ils meds finanzials da la SSR pli fitg ch'il Cussegl federal. La SSR duai sa restrenscher ad in «servetsch indispensabel per la generalitad». L'iniziativa pretenda da limitar la taxa per chasadas privatas a 200 francs per onn. Plinavant vul ella deliberar tut las interpresas da l'obligaziun da pajar ina taxa. Tenor il comité d'iniziativa pajan la populaziun e bleras interpresas en Svizra las pli autas taxas sin l'entir mund. Taxas uschè autas na sajan betg giustifitgadas. L'iniziativa distgargiass las chasadas e las interpresas pitschnas e mesaunas, uschia ch'i restass a tuts dapli daners per viver. Er stoppia la SSR puspè sa concentrar sin sia incumbensa centrala. L'iniziativa pertutga unicamain la SSR. Betg pertutgads da l'iniziativa n'èn radios locals e televisiuns regiunalas, che survegnan daners or da la taxa da radio e televisiun.

Text da votaziun da l'iniziativa federala dal pievel «200 francs bastan! (Iniziativa SSR)»

Consequenzas pussaivlas sche l'iniziativa vegniss acceptada

Reducziun da programs

Sche l'iniziativa vegniss acceptada, stuess la SSR reducir cleramain ses programs e stritgar emissiuns. En spezial dessi pli paucs rapports or da las regiuns, e lieus da producziun existents crudassan davent. Er emissiuns da divertiment e programs da sport na pudessan strusch pli vegnir transmess da la SSR. A partir da l'onn 2029 survegniss la SSR anc circa 630 milliuns francs or da la taxa – pia circa la mesadad dals daners d'enfin ussa.

Indebliment da la cultura svizra

L'iniziativa avess er consequenzas per la cultura svizra, che vegn promovida oz tras la SSR. Uschia survegniss per exempel la branscha da film e da musica damain sustegn. Uniuns da musica e da cultura avessan damain pussaivladads da sa preschentar en las emissiuns da la SSR.

Meds da reclama van a l'exteriur

Sche la SSR survegniss damain daners e sche la purschida da televisiun daventass uschia main attractiva, pudess ella perder aspectaturas ed aspectaturs. Tras la reducziun da l'utilisaziun dals programs da la SSR sa reducissan er las entradas tras reclama. Daners da reclama pudessan ir a las grondas firmas da tecnologia a l'exteriur – per exempel ad Alphabet (Google e YouTube) ed a Meta (Facebook, Instagram e WhatsApp).

Consequenzas per la democrazia

Per che la democrazia directa funcziunia, sto la populaziun esser bain infurmada. La SSR ha ina incumbensa d'infurmaziun e furnescha ina contribuziun impurtanta a favur da la furmaziun democratica da l'opiniun e da la voluntad. Sche l'iniziativa vegniss acceptada, na pudess la SSR betg pli furnir questa prestaziun sco oz.

Consequenzas per l'economia publica

Sche la taxa vegniss reducida en il senn pretendì da l'iniziativa, stuess la SSR stritgar – tenor in studi da BAK Economics – var 3000 plazzas. Ulteriuras 3000 plazzas giessan a perder indirectamain tar autras interpresas (auturas ed auturs, acturas ed acturs, firmas da producziun da l'industria audiovisuala, economia da construcziun, gastronomia e.u.v.).

Reducziun da la francada regiunala

Sche l'iniziativa vegniss acceptada, na pudess la SSR betg pli finanziar il sistem federal actual cun set lieus da producziun principals e cun 17 biros regiunals. Il studi davart las consequenzas per l'economia publica parta dal fatg, che la SSR stuess centralisar la producziun en in unic lieu sin donn e cust da las regiuns linguisticas pli pitschnas.

Die SRG verfügt über Hauptstandorte in Genf, Lausanne, Bern, Basel, Zürich, Chur und Comano. Zusätzlich verfügt sie über zahlreiche Regionalstandorte. — Lieus da producziun da la SSR

Arguments dal Cussegl federal e dal parlament

Per il Cussegl federal e per il parlament purtass in «gea» a l'iniziativa ina cesura profunda en la purschida da radio e televisiun. Els refusan l'iniziativa cunzunt per ils suandants motivs:

Il Cussegl federal ha gia concludì da distgargiar las chasadas e las interpresas. A partir da l'onn 2029 importa la taxa per las chasadas mo pli 300 francs. Questa reducziun da la taxa è commensurada. Ed a partir dal 2027 ston anc damain interpresas che oz pajar ina taxa.
Il Cussegl federal ha incumbensà la SSR da spargnar. L'interpresa è gia vi da realisar questa incumbensa. La SSR orientescha sia purschida pli fitg a la moda e maniera, co che las medias vegnan utilisadas ozendi.
Per prender resguard sin las medias privatas vul il Cussegl federal precisar l'incarica da prestaziun da la SSR. En ils secturs divertiment e sport duai la SSR per exempel sa focussar sin quels secturs, ch'ils purschiders privats n'han betg en lur program.
L'iniziativa va memia lunsch: Ella stritga memia blers meds finanzials a la SSR. Sche l'iniziativa vegniss acceptada, stuess la SSR sminuir l'interpresa. Il public stuess desister da bleras purschidas da radio e televisiun.
La Svizra è ina cuminanza da quatter regiuns linguisticas e culturas. Cun l'iniziativa na pudess la SSR betg pli porscher en tut las regiuns linguisticas cuntegns multifars e da buna qualitad.
L'interpresa SSR è francada en tut las regiuns da la Svizra. Cun l'iniziativa stuess ella previsiblamain centralisar la producziun en in unic lieu sin donn e cust da las regiuns pli pitschnas. Plirs millis plazzas giessan a perder.
Sche l'iniziativa vegniss acceptada, daventass la purschida da la SSR bler pli pitschna e main attractiva. La SSR perdess consequentamain ina part da ses public. Sias entradas tras reclama sa reducissan ed ils daners da reclama giessan a l'exteriur.
L'iniziativa vul reducir la purschida da la SSR. Uschia giessan a perder blers cuntegns che han in connex cun la Svizra.
L'iniziativa empermetta ina distgargia, po dentant chaschunar custs supplementars per il public. Per purschidas d'emetturs cun abunaments betg gratuits e per servetschs da streaming stuess il public pli probabel pajar supplementarmain – per exempel per transmissiuns da sport, per serias e per films.