Ils 21 da matg 2017 han las votantas ed ils votants acceptà la revisiun da la Lescha d’energia. Ella serva a reducir il consum d’energia, ad augmentar l’effizienza energetica ed a promover las energias regenerablas. Plinavant vegni scumandà da construir novas ovras nuclearas. La Svizra po uschia sminuir la dependenza d’energias fossilas importadas e rinforzar las energias regenerablas indigenas. Quai stgaffescha plazzas da lavur e porta investiziuns en Svizra.
Tge è la Strategia d’energia 2050?
Suenter la catastrofa da reactur da Fukushima l’onn 2011 han il Cussegl federal ed il parlament decidì da sortir pass per pass da l’energia nucleara. Questa decisiun sco er ulteriuras midadas radicalas en l’ambient internaziunal d’energia pretendan da renovar il sistem d’energia da la Svizra. Per quai ha il Cussegl federal elavurà la Strategia d’energia 2050. Ella suonda l’orientaziun da la Strategia d’energia 2007 en moda rinforzada e cun novas finamiras. Nov è en general che las tschintg ovras nuclearas existentas vegnan messas ord funcziun e na vegnan betg remplazzadas a la fin da lur durada da manaschi segira.
Mesiras
Effizienza energetica
Avair ina relaziun spargnusa cun l’energia è raschunaivel, spargna daners e reducescha ils imports d’energia. La Lescha d’energia cuntegna differents impuls per reducir il consum d’energia tar edifizis, en il traffic e tar apparats electronics sco er per augmentar l’effizienza energetica.
Energias regenerablas
La Lescha d’energia ha l’intent da rinforzar las energias regenerablas indigenas. Latiers tutgan la forza idraulica tradiziunala e las novas energias regenerablas sco il sulegl, la laina, la biomassa, il vent e la geotermia. Quai sa paja: Dapli energias regenerablas ch’èn disponiblas e main che la Svizra è dependenta da l’import d’energias fossilas.
Sortir da l’energia nucleara
Las ovras nuclearas existentas dastgan restar en funcziun, uschè ditg sco ch’ellas èn segiras. Cun il project d’energia vegni dentant scumandà da construir novas ovras nuclearas. Uschia poi vegnir sortì pass per pass da l’energia nucleara.
Mesiras en il sectur da las raits electricas
In factur-clav decisiv tar la reconstrucziun dal provediment d’electricitad è il svilup da la rait da conducts. Quel sto vegnir adattà als novs basegns. La reconstrucziun e la renovaziun da las raits d’electricitad avanzan dentant en moda fitg plauna. Il motiv per quai èn savens lungas proceduras giuridicas. La Strategia d’energia 2050 porta in’acceleraziun da questas proceduras.
Contact
Secretariat general
Departament federal per ambient, traffic, energia e communicaziun DATEC
Chasa federala nord
CH-3003 Bern
- Tel.
- +41 58 462 55 11